Xoş gəldi dün ol ayə sirişkim nəzarəsi
Xoş gəldi dün ol ayə sirişkim nəzarəsi, Böylə olur ki, aşiqin işlər sitarəsi.
Ey hər mərəz ilacinə hökm eyləyən həkim, Bimari-dərdi-eşq olanın yoxmu çarəsi?
Çıxmaq dilər səfineyi-tən cünbüşilə can Dəryayi-eşqdən ki, ədəmdir kənarəsi.
Derlər ki, var Vamiqü Məcnun, əcəb degil, Dağılmış ola atəşi-eşqim şərarəsi.
Noldu gətirmədin ələ sədparə könlümü, Vəhm eylədinmi əl kəsə bu şişə parəsi?
Səndən həmişə tiri-bəladır gələn mənə, Böylə olurmu aşiqü mə’şuqin arəsi?
Ey söyləyən Füzuliyə eşq içrə səbr qıl, Söylə, bu mərhəm ilə kimin bitdi yarəsi?
Lüğət: Sirişk – göz yaşı; Şərarə – od parçası, qığılcım