Xaki-payindən gözümə sürmə, ey yar, istərəm

Xaki-payindən gözümə sürmə, ey yar, istərəm, Gizli qalsın, bilməsin bu sirri əğyar istərəm.

Cövrünü məndən kəm etməz, yarda bu nə lütfdür, Hardan o bilmiş ki, mən yarı cəfakər istərəm.

Kimsə şərh etməz ona mən çəkdiyim möhnətləri, Ahü naləmdən məni duysun o dildar istərəm.

Istəməzdim yar girsin bir kəsin röyasına, Ağlaram sübhə qədər, çün xəlqi bidar istərəm.

Qorxaraq, gəlməz xəcalətdən mənə sarı əcəl, Çün bilir ondan əlaci-qəlbi-bimar istərəm.

Xam xəyalındır, deyə gülsün mənə qoy nazlı yar, Ağlaram, ləli-ləbi olsun şəkərbar istərəm.

Ey Füzuli, zülfü salmış rişteyi-canə düyün, Türreyi-tərrar ilə açsın onu yar istərəm.