Xaki-payin, dilbəra, bir taci-dövlətdir mana
Xaki-payin, dilbəra, bir taci-dövlətdir mana, Bəs yüzün görmək sənin bəxtü səadətdir mana.
Çün ğəmi-eşqində ölməkdir həyati-cavidan, Həq bilür ölmək degil ol, eyni-rahətdir mana.
Munca kim, dərdündə zəhmət çəkmişəm, ey bivəfa, Çünki səndəndir bu zəhmət, cümlə rahətdir mana.
Gərçi məndən dər hicab olursan, ey arami-can, Yüzünü görsətdigin eyni-inayətdir mana.
Düşdə gərdü dün Xətayi, yar olubdur həmdəmi, Ya düşümdür, ya xəyalım, bu nə halətdir mana?
Lüğət: Cavidan – əbədi; Hicab – örtük, pərdə, utanma; Dün – dünən, gecə