Üzün bərgi-güli-tərdir, güli-tər

Üzün bərgi-güli-tərdir, güli-tər, Boyun sərvi-sənubərdir, sənubər.

Xuraman qamətin bər çeşmeyi-çeşm, Səmənbərdir, səmənbərdir, səmənbər.

Sənin şəm’i-camalından vücudum Münəvvərdir, münəvvərdir, münəvvər.

Bəninlə zülfü rüxsarın həmişə Müənbərdir, müənbərdir, müənbər.

Mana peyvəstə şol mehrabi-əbru Bərabərdir, bərabərdir, bərabər.

Zəhi dövlət ki, vəslin gah-gahı Müyəssərdir, müyəssərdir, müyəssər.

Dimağım buyi-zülfündən dəmadəm Müəttərdir, müəttərdir, müəttər.

Sənin nəqşi-xəyalın can içində Müsəvvərdir, müsəvvərdir, müsəvvər.

Sənayedən nə sən’ətdir, Nəsimi Mükərrərdir, mükərrərdir, mükərrər.