Ta o mahın xətü xalinə nigah eyləmişəm
Ta o mahın xətü xalinə nigah eyləmişəm, Günümü eşqlə aləmdə siyah eyləmişəm.
Lərzə eylər bədənim kureyi-simab kimi Ki, baxıb ayineyi-hüsnünə ah eyləmişəm.
Göz yaşilə ləbi-dildardən aldım busə, Su qatıb badeyi-gülfamə günah eyləmişəm.
Çox da nadan degiləm, anlamayım xeyrü şərim, Meyə sərf etməyən ovqatı təbah eyləmişəm.
Neylərəm ayü günü, tək meyim olsun, ərəqim Ki, bunu mehri-dirəxşan, onu mah eyləmişəm.
Öpmüşəm gün kimi mən xaki-dəri-dildarı, Hər zaman kim, tələbi-rüfətü cah eyləmişəm.
Aləmin dərdü qəmindən xəbərim yox, Seyyid, Mən ki, meyxanəni illərdi pənah eyləmişəm.