Şəha, könlün həmişə biqəm olsun

Şəha, könlün həmişə biqəm olsun, Əlində daima cami-Cəm olsun.

Gülü lalə camalından xəcildir, Yüzün yazı həmişə xürrəm olsun.

Sana eyşü nişatü kamirani, Həsudun dərdi çox, ömrü kəm olsun.

Dəfü çəngü ciğanə, nayü tənbur Düzülsün daima zilü bəm olsun.

Səni sevənlərə eyşü tamaşa, Səni sevməyən qəm həmdəm olsun.

Məni gər cövri-hüsnün öldürürsə, Sənin ömrün tənabı möhkəm olsun.

Rəqib məndən sorar: nəndir sənin yar? – Əzizimdir, ümidimdir, nəm olsun?

Gətir ol badəni, çün həmdəm olduq, Içəlim ta kim, ol sübhi-dəm olsun.

Nəsimi xəstədil hicrindən öldü, Qoy ol biçarəni ta məhrəm olsun.