Sənsən gözəlim hər gözəlin əfsəri-tacı

Sənsən gözəlim hər gözəlin əfsəri-tacı, Hər ölkədən alsan yeri var bacı-xəracı.

Şəkkər ləbini ver əmim ey qönçə dəhanım, Çünki mərəzi-eşqin odur qəti əlacı.

Hər bir sözünün kəlməsi bir acı həqiqət, Bimara dəva nəfi nədir olmasa acı.

Daşdır acı söz şişə mənim qəlbi-həzinim. Sındırma amandır o daş ilə bu zücacı.

Vaiz məni gəl Kəbəyə göndərmə, nə hacət, Mən olmuşam ol qibleyi-əbru ilə hacı.

Məqbul deyil səcdəyi-xaki-dəri dilbər. Qəlbində əgər parlamasa eşq siracı.

Batil orucun əcrinə aldanma Şəfai, Ehsan elə, doydur para əpbəklə bir acı.