Sənsən cahan içində bu gün padşahimiz
Sənsən cahan içində bu gün padşahimiz, Ruzi-əzəldə həzrətin oldu pənahimiz.
Cövr etmə mən şikəstə dilü binəvayə kim, Çün səndən özgə kimsənə yox dadxahimiz.
Hər xanda kim, sücud edərisəm be e’tiqad, Mehrabi-qaşlarındadurur qəbləgahimiz.
Bir gün tərəhhüm eyləmədin xaksarına, Yarəb, nə sadir oldu qapunda günahimiz?
Ğəmdən Xətayi dərd ilən incəldi çün hilal, Bir mahdır görünmədi ol hüsni mahimiz.
Lüğət: Cövr – zülm; Mehrab – məsciddə qiblənin istiqamətini göstərən dairəvi yer; Tərəhhüm – rəhm etmək, birisinə acımaq; Hilal – aypara; Hüsn – gözəllik