Mən qəmə öyrənmişəm, biqəm mənə lazım deyil

Mən qəmə öyrənmişəm, biqəm mənə lazım deyil, Qəmdə zövq olsa əgər, ol həm mənə lazım deyil.

Mən qaçarsam öz-özümdən, var yeri, üzlətdə çün Vəhşilərdir həmdəmim, adəm mənə lazım deyil.

Mərdümi-çeşmim də olsa, istəməm görsün gözüm, Sənsiz, ey göz mərdümü, aləm mənə lazım deyil.

Saqiya, mey paylayanda camımı tök torpağa, Içmərəm mey, xatiri-xürrəm mənə lazım deyil.

Göz yaşım şadlıq büsatın sel kimi eylər xərab, Gül üzün yox, dideyi-pürnəm mənə lazım deyil.

Qaneyəm kuyi-muğanda bir qədəh dürdi-meyə, Təxti-Cəmşid ilə cami-Cəm mənə lazım deyil.

Yar cəfasilə, Füzuli, yox vəfayə hacətim, Qəlbimə xoşdur yara, mərhəm mənə lazım deyil.