Ləzzəti olmaz vüsalın dərdi-hicran, olmasa

Ləzzəti olmaz vüsalın dərdi-hicran, olmasa, Gül açılmaz, qönçələr gülməz, zimistan, olmasa,

Göz yaşım seylab tək axmaz, bilinməz sirri-eşq, Həsrəti-ruyunla ta qəlbim qızıl qan, olmasa.

Şövqi-vəslinlə yaşar hicrində aşiqlər bütün, Kim dözər ol müşkülə ümmidi-asan, olmasa.

Mən dedim: canana can verməkdədir, zövqi-həyat, Bilməyənlər söylədi: canan nədir, can olmasa.

Zülfünə məhrəm olub, tapmaz bu şəni, şanələr, Ta ki, yüz yerdən könüllər tək o şan-şan, olmasa.

Kiprigin yağdırsa oxlar, köz-köz olsam, ölmərəm, Qətlimə ta qaşlarından hökmü fərman, olmasa.

Tənə daşı cismivi xoşdur Şəfai, etsə xak, Un olub, qiymətli olmaz dən, dəyirman, olmasa.