Lə’li-nabın çeşməsində abi-heyvan gizlidir

Lə’li-nabın çeşməsində abi-heyvan gizlidir, Dürci-yaqutunda, ey can, dürrü mərcan gizlidir.

Ləblərin şirin dəhanın gərçi əvvəl rəmz ilə Açar əsrarın vəlakin, sirri-pünhan gizlidir.

Canımın canı qəmindir, şol səbəbdən, ey nigar, Şad olur canım ki, canda daim ol can gizlidir.

Şol xədəngi-qəmzəni kim, canıma urdu gözün, Qan gedər yürəkdən, amma zəxmi-peykan gizlidir.

Ənbərin zülfündə üzün gizlənirsə, nə əcəb, Şəb niqabında həmişə mahi-taban gizlidir.

Ey təbibi-ami, əl çək çarə qılmaqdan mana, Aşiqin canında daim dərdi-canan gizlidir.

Qane oldu dərdilə səndən Nəsimi, ey nigar, Şol səbəbdən kim, sənin dərdində dərman gizlidir.