Kim var, görəsən, kuyinə yarın güzər etsin

Kim var, görəsən, kuyinə yarın güzər etsin, Bu haləti-zarımdan onu baxəbər etsin.

Bu dərdi-fəraq eylədi dilxun məni-zari, Yarəb, görüm ol zalımı məndən betər etsin.

Hicran gecəsi zali-fələk istədi naçar, Ulduzlarını ahım oxuna sipər etsin.

Yandıqca ürək qəm oduna, seyli-sirişkim Az qaldı Azərbaycanı bəhri-xəzər etsin.

Heç olmadı ol səngdil ayinə cəmalə, Bu ahi-cigərsuzlərim bir əsər etsin.

Yaran deyin, ol yari cəfakarə saqınsın, Bu eylədiyi cövrü-cəfadən həzər etsin.

Kam almayacaq istədiyindən o ki, istər Öz şənliyinə özgələri didə tər etsin.

Gördünmü o nahəq qanı pərvanəi-zarın Şəmə o qədər vermədi möhlət, səhər etsin.

Bəs eylə, Şəfai, sözü gəl bunca uzatma, Qorxum budu ol dilbər üçün dərdəsər etsin.