Hər kimin ki, qəlbi var, bir simbər cananı var

Hər kimin ki, qəlbi var, bir simbər cananı var, Simbər cananı varsa, dideyi-giryanı var.

Hər kimin ağlar gözü varsa, başı sevdalıdır, Bir gözəl eşqilə dildə min qəmi-pünhanı var.

Kim könül vermiş cahanda nazlı bir məhparəyə, Qan dolu bir cüt gözü, bir sineyi-büryanı var.

Bicəhət axmaz ciyər qanı gözündən kimsənin, Gözdəki hər qətrə qanın sinədə tufanı var.

Kim ki, göz dikmiş gözəl bir dilbərin rüxsarinə, Üz verən hər bir bəlanı çəkməyə imkanı var.

Hər bəla yetsə məhəbbətdən bizə, verməz zərər, Hər bəlanın aşiqə bir zövqi-bipayanı var.

Odlu qəlbindən Füzuli ah çəkirsə dəmbədəm, Qafil olma, sevgilim, təsirli min peykanı var.