Hər kəsin dildə qəmi-simbəri olmuş ola

Hər kəsin dildə qəmi-simbəri olmuş ola, Xoşdur eşqində onun çeşmi-təri olmuş ola.

Odur aləmdə nəzər sahibi, açdıqda gözün Bir gözəl mahliqayə nəzəri olmuş ola.

Eşqdən dönməyən aləmdə o aşiqdir kim, Yatmayıb, kuyi-nigarə səfəri olmuş ola.

Hər xəbərsiz nəyə lazım, mən onun bəndəsiyəm Ki, mənim hali-dilimdən xəbəri olmuş ola.

Neylərəm hər yetəni, mən sevirəm ol kəsi ki, Eşq rahində onun bir hünəri olmuş ola.

Səhldir gərçi fəraqət, quluyam mən o kəsin, Qəlbi qəmlə dolu, yanmış ciyəri olmuş ola.

Qəmi-eşqində Füzuli eləyib can nəzri, Eylə zənn etmə ki, başqa göhəri olmuş ola.