Hanı o mah ilə mən işrət etdigim gecələr

Hanı o mah ilə mən işrət etdigim gecələr, Tülui-sübhə kimi söhbət etdigim gecələr.

Gedəndə yar, durub naz ilə kənarından Alıb ələ ətəgin, minnət etdigim gecələr.

Düşəndə xatirimə göglərə çıxar ahım, O mahparə ilə xəlvət etdigim gecələr.

Ayaq yalın, baş açıq, zəmzəmi-sirişk töküb, Təvafi-kuyi üçün niyyət etdigim gecələr.

Gəlib nihani dəri-yarə, üz qoyub xakə, Qübarın öpməgə ol cürət etdigim gecələr.

Düşərmi bir də ələ, ey xudayi-həyyü əhəd, O sərvqamət ilə ülfət etdigim gecələr.

Deyəndə yar mənə dərd, mən deyərdim can, Məzaqə təlx sözün şərbət etdigim gecələr.

Mükərrər eyləyib ol acı sözlərin, Seyyid, Özüm-özümə dönüb ləzzət etdigim gecələr.