Günah mərəzlərinin cümləsinə sənsən əlac

Günah mərəzlərinin cümləsinə sənsən əlac, Şəfisən, hamı aləm şəhaətə möhtac.

Sənin kəramətin ilə əziz olub islam, Şərafətinlə sənin sərbülənd olub merac.

Gecə qaranlığına şəmi-qüdrətindir ay, Fələklərin başına xaki-payın olmuş tac.

Şəriətinlə hər iş xətm olubdur aləmdə, Veribdi sikkeyi-dinin təriqi-dinə rəvac.

Ayağının şərəfi ərşi qıldı aliqədr, Cəmalın ilə ağ oldu münəvvərü minhac.

Edibdir hökmün ilə əql hər işi icra, Tapıbdır əmrin ilə ruh can evində məzac.

Ümidini necə kəssin Füzuli lütfündən, Dənizsə lütfün, odur bircə qətrəyə möhtac.