Gül o gülüzlü gülümdür güli-rəna nəçidir

Gül o gülüzlü gülümdür güli-rəna nəçidir? Şahidi-eşq mənəm, bülbüli-şeyda nəçidir?

Nərgiz ol didəi-şəhlaləridir sevgilimin, Bağü gülşəndə açan nərgizi-şəhla nəçidir?

Demə yarın ləbini ləl, dəhanın qönçə, Ləlü yaqut nədir, qönçəi-həmra nəçidir?

Zülfünün hər teli bir Leylidir ol məhvəşin, Qeys məşuqəsi əfsanəi-Leyla nəçidir?

Mənəm eşqin dəli divanəsi, kimdir Məcnun, Mən olan yerdə o sərgəştəi-səhra nəçidir?

Şəmi rüxsarına yarın məni-yanmaqda görən, Dedi, pərvanə nədir, şəmi şəb-ara nəçidir?

Məst edər aşiqi, məşuqu Şəfai, qəzəlin, Mey nədir, badə nədir, sağəri-səhba nəçidir?