Göz içrə ol gözələ bir əziz məkan verdim

Göz içrə ol gözələ bir əziz məkan verdim, Bəzək deyə, evinə ləxtə-ləxtə qan verdim.

Bu canı töhfə gətirdim ədəm diyarından, Rəva görüb sənə ol canı ərməğan verdim.

Tutanda zülfünü başım tutuldu sevdayə, Özüm bu möhnətə, dərdə riza, inan, verdim.

Günəş camalını görcək gözüm yaşı qurudu, Gözümdən axmadı yaş, hər qədər təkan verdim.

Gözümdə yüz gözəlin nəqşi əksini tapdı, Onun xəyalına qəlbimdə yer haçan verdim?

Kədər bağında təzə tingəyəm, bu dağlar ilə Bahari-hicrdə yarpaqlanıb, fidan verdim.

Füzuli, yadə salıb ağlaram o dilbəri kim, O güldü, mənsə cavabında min fəğan verdim.