Görcək o gülü bağı-gülüstanı itirdim
Görcək o gülü bağı-gülüstanı itirdim, Sərgəştə qalıb rahi-biyabanı itirdim.
Bir xəndəi-şəkkərlə alıb canımı getdi, Cananə baxın, onu görüb canı itirdim.
Dami-teli-zülfə ilişib bülbüli-könlüm, Seyri-çəmənü abü hava danı itirdim.
Vəqta ki, təmə etdim o durdanei-xalə, Adəm kimi ol rövzəi-rizvanı itirdim.
Hər kəs səni görcək itirib dini-təriqin, Mən dini fəramuş edib imanı itirdim.
Bir busə üzündən mənə versəydi nigarım, Heç bilməz idim ki, bunu, ya anı itirdim.
Meyxanədə xəlq ömri-əməl tapdı Şəfai, Mən sovməədə ömrü edib fani, itirdim.