Gəl ey şeyda könül, get aşiqi-canan olursan, ol

Gəl ey şeyda könül, get aşiqi-canan olursan, ol, Vəfalı olsa cananın, neçə heyran olursan, ol.

Məhəbbət eylə, bir canana ki, sevsin səni can tək, Deyilsə, mübtəlalikdir, gəzib nalan olursan, ol.

Vurulma hüsni-zibayə, ləbi-xəndanə can vermə, Gözəl əxlaqili bir dilbərə, qurban olursan, ol.

Sevimli eşq leylasi olursa, nazlı məşuqə, Onun eşqində sən məcnuni-sərgərdan, olursan, ol.

Səni aldatmasın könül, kamanqaşlar, xumar gözlər, Ona yalnız tamaşa etməyə mehman, olursan, ol.

Vəfalı bir gözəldən ötrü çox gəzdimsə, az gördüm, Könül, sən də gəl imdi, gəl, o azlardan olursan, ol.

Şəfai, yoxdur heç bir ölkədə bu qarə gözlərdən, Vətən ceyranıdır bunlar, baxıb heyran olursan, ol.