Gəcrəvişdir bu asiman, əfsus!

Gəcrəvişdir bu asiman, əfsus! Bivəfadır cəhanü can, əfsus!

Nə yaman dağ imiş oğul dağı, Mənə üz verdi imtahan, əfsus!

Göz evin qoydu nagəhan xali, Oldu ol mərdümin nəhan, əfsus!

Mehrini kəsdi mən bəlakeşdən, Oldu xak ilə mehriban, əfsus!

Ey gözüm nuri, hasili-canım, Çəkərəm sənsiz əlaman, əfsus!

Sərv qəddin düşübdü xak üzrə, Sənə bid oldu sayəban, əfsus!

Səni ləbtəşnə yad edəndə, olur Göz yaşım cuy tək rəvan, əfsus!

İzzətü cahü dövlət içrə səni Görmədim bircə kamran əfsus!

Arizuvü həvəs xəcil səndən, Olmadın heç şadman, əfsus!

Səni ağuşə çəkdi xaki-siyah, Əşkdən bağrım oldu qan, əfsus!

İtirib bir şükuftə qönçəsini, Qaldı sərkəştə Natəvan, əfsus!