Fəğanə gəldi könül dərdini bəyanə görə

Fəğanə gəldi könül dərdini bəyanə görə, Məcal olmadı bu əşki-xunfəşanə görə.

Məni cavanlığa məğrur edirdi şövqi-ləbin, Kəmanə döndü qədim, əbruyi-kəmanə görə,

Xiyali-xalilə bağlandı zülfünə könlüm, Düçari-dam olur əlbəttə mürğ danə görə.

Dəli olub demə, Məcnun düşdü səhrayə, Çəkildi xəlqdən ol binəva əmanə görə.

Dedim ki, saxlaram əsrari-eşqini gizlin, Açıldı ah nədim naləvü fəğanə görə,

Nə qəm yetişsə fəraq aləmində səbr eylə, Bəlayi-hicrə düşər hər kəs imtahanə görə.

Şəfai, neyləsə əğyar öz cəzasın alar, Yamanlıq eyləmə bu bivəfa cahanə görə.