Eylədi vəsf könül arizi-cananı qələt
Eylədi vəsf könül arizi-cananı qələt, Oxudu tifl bu məktəbdə «Gülüstan»ı qələt.
Sandı güldə tapılır nəfxeyi-zülfi-siyəhin, Etdi hər fəsldə dil seyr bu bustanı qələt.
Səfheyi-arizinə katibi-qüdrət o gülün, Biməqam etdi rəqəm ol xəti-reyhanı qələt.
Sandılar kim düri-dəndanına həmtay olur, Saldılar məğlətəyə gövhəri-qəltanı qələt.
Bağdə açdı yüzündən o güli-tazə niqab, Çaşdırıb bülbül özün, eylədi əlhanı qələt.
Qaşların «nuni-qələm», zülfünü «Vəlleyl» dedim, Dedilər kim, oxudun ayeyi-quranı qələt.
«Qab-qovseyn» oxudum əbruyi-yarı, Seyyid, Vay o gündən ki, müfəssir verə mənanı qələt.