Ey üzün gülşəni gülzari-cahandan rəna

Ey üzün gülşəni gülzari-cahandan rəna. Nə qədər var güli-rəna üzün ondan rəna.

Hüsn bağında gözəl sərvlər olmuş, amma Olmamış sən kimi bir sərvi-rəvandan rəna.

Açmayıb baği-lətafətdə elə gül ki, ola Sən kimi sərvqədü qönçədəhandan rəna.

Bir sənin eşqini seçdim bu cahanda, nə edim, Sənsən eşq əhlinə xubani-zamandan rəna.

Sərv qamətlər ola qəddinə, ey şux, fəda, Çünki qəddin görünür sərvi-cinandan rəna.

Qapının torpağı tək pak deyil baği-cinan, Huri-cənnət də deyil sən kimi candan rəna.

Kirpiyin gözdə, Füzuli, o səbəbdən yeri var Ki, olubdur dili-zarimdəki qandan rəna.