Ey rövzeyi-behişt cəmalın nişanəsi
Ey rövzeyi-behişt cəmalın nişanəsi, Kövsər o ləli-şəhd-misalın nişanəsi.
Duzəx nümuneyi-ələmi-dərdi-firqətin, Cənnət nəimi-baği-visalın nişanəsi.
Bülbül nəvayə gəlməz idi şuri-eşq ilə, Gül olmasaydı arizi-alın nişanəsi.
Etməzdi hiç kəs Həcərül-əsvədi təvaf, Gər olmasaydı üzdəki xalın nişanəsi.
Mehrabə Seyyid etməz idi, baş əgib, namaz, Tağında olmasaydı hilalın nişanəsi.