Ey qönçə dəhan, bir güli-xəndan olacaqsan

Ey qönçə dəhan, bir güli-xəndan olacaqsan, Bülbül kimi gülşəndə qəzəlxan olacaqsan.

Təkmil edəcəkdir səni bu təbi-rəvanın, Bir şairi-xoş söhbəti-dövran olacaqsan.

Xidmət edəcəkdir vətənə, ellərə şerin, Oğlum, ata yurdunda bir ehsan olacaqsan.

Ay tək gəzərək, eşqü məhəbbət günəşindən Kəsb iylə işıq, gün kimi taban olacaqsan.

Dillərdə adın Namiqi-dövran deyilirkən, Hər cismdə can, canlara canan olacaqsan

Fəxr etmə Şəfai, demə şerimdə səfa var, Sən Namiqin əşarına heyran olacaqsan.