Ey məni hicran əlində zarü giryan eyləyən
Ey məni hicran əlində zarü giryan eyləyən, Çeşmimi giryan edüb sinəmni büryan eyləyən.
Gərçi bu dərdə məni saldın, əya arami-can, Həm yenə dərdindürür bu dərdə dərman eyləyən.
Gərçi eyd oldu cəmalın xəlqə, ey əbru hilal, Bəndəyəm ol eyd içün, canımnı qurban eyləyən.
Gərçi ğəmzən tiğ olubdur xeyli-üşşaqə, vəli Çeşmi-xunxarındurur həm dəmbədəm qan eyləyən.
Eşqinin sərbazları çoxdur, vəli yoxdur dəxi Bu Xətayi xəstə tək ahəngi, meydan eyləyən.
Lüğət: Eyd – bayram; Əbru – qaş; Hilal – aypara; Tiğ – qılınc; Vəli – ancaq, lakin; Çeşmi – giryan – ağlar göz