Ey könül, yarı istə, candan keç
Ey könül, yarı istə, candan keç, Səri-kuyin gözət, cəhandan keç!
Ya təmə’ kəs həyat zövqindən, Ya ləbi-lə’li-dilsitandan keç.
Mülki-təcriddir fərağət evi, Tərki-mal eylə, xanimandan keç.
Laməkan seyrinin əzimətin et, Bu xərab olacaq məkandan keç.
E’tibar etmə mülki-dünyayə, E’tibari-ülüvvi-şandan keç!
Əhli-dünyanın olmaz axirəti, Ey Füzuli, bu xakdandan keç!
Lüğət: Laməkan – yersiz, məkansız; Ülüvv – ucalıq, yüksəklik