Ey könlüm alan qaşları yay, gözləri cadu

Ey könlüm alan qaşları yay, gözləri cadu, Ey nərgisi-məstü üzü gül, bənləri hindu.

Ta şövqi-cəmalın gələli eynimə qarşu, Hər ləhzə qılır həsrət ilə bənzimi sayru.

Gəl firqəti-hicrin nə qılır canıma gör kim, Nola qılasan lütf ilə bir dərdimə daru?

Nöh çərxi-fələkni qılıram ah ilə əzrəq, Ol dəm ki, edəm vəslin üçün dərd ilə yahu.

Ol zülfi-müsəlsəlni mənim boynuma salgil, Ta bəndi-səlasil düşə əz gərdəni-ahu.

Tərk etdi Nəsimi yoluna canü cahanı, Ey qaşları yay, kirpigi ox, gözləri cadu.