Dilbəra, mahim mənim fərrüx cəmalındır sənin

Dilbəra, mahim mənim fərrüx cəmalındır sənin, Gün dəxi şol təl’əti-fərxəndə falındır sənin.

Özgə gözlər gögə baxar görmək içün mahi-nov, Eyd içün mən baxdığım qaşi-hilalındır sənin.

Dinləmən ahəngi-qumri, bülbülin sövti ki var, Guşi-dildə hər dəmadəm qeylü qalındır sənin.

Munca dəmdir dilbərin gördün vüsalın, ey rəqib, Çün kəmalə yetmədin, imdi zəvalındır sənin.

Sürməgil mülki-Süleymandan Xətayi xəstəni, Çünki bir muri-zəifi-payimalındır sənin.