Canan yolunda başını eylər nisar şəm
Canan yolunda başını eylər nisar şəm, Olmuş bu yolda ömr uzunu payidar şəm.
Yoxsa başında bir sənəmin şövqi-kakili, Olmuş mənim kimi nə üçün əşkbar şəm?
Gər yox başında atəşi eşqin, səbəb nədir, Qəlbi qaraldı, görmədi xoş ruzigar şəm?
Şəmi-rüxündən od tutaraq yandı sinəsi, Çox da əbəs deyil ki, olub biqərar şəm.
Dərdinlə yatmayır gecələr, ta ki, sübhədək Hicrindən ağlayır belə biixtiyar şəm.
Xurşidi-ruyi olmasa gər, xoş deyil günüm, Yaxsam fələk misalı əgər mən həzar şəm.
Çıxmaz, Füzuli, zahirə qəm, bərqi-ahsız, Bəsdir sənə qarə gecələr bu yanar şəm.