Cami-eşqindir edən aşiqləri meyxanəlik

Cami-eşqindir edən aşiqləri meyxanəlik, Yoxsa ey məh, kim bilirdi ki, nədir məstanəlik.

Atəşi-ahi-cigərsuzimlə yanmazdı könül, Olmasaydı şəmi-rüxsarın əgər pərvanəlik.

Qan olur qəlbim dəgəndə şanə ol geysulərə, Olmayaydı kaş o ənbərbar tellər şanəlik

Nə yetər biganələrdən etirazım var ikən, Vay o gündən aşinalərdə ola biganəlik.

Başıma cəm oldu bayquşlar xəyalatım kimi, Gördülər çün xanəyi-qəlbim olub viranəlik.

Aşiqi-kamil demə məcnuni-səhragərd üçün, Məktəbi-eşqin hələ bir dərsidir divanəlik.

Olmasın bir dəm Şəfai, boş əlin peymanədən, Olmayıbdır ta ki, başın kasəsi peymanəlik.