Bizə hədsiz cəfalər gördü məhrulər rəva hər dəm

Bizə hədsiz cəfalər gördü məhrulər rəva hər dəm, Ömür yoldaşı olduq onlara, gördük cəfa hər dəm.

Sataşdı hüsnünə şəmin gözü, rəşk oduna yandı, O kəs ki, qibtə bilməz, rəf olar ondan bəla hər dəm.

Mənə heç bir gözəl yer vermədi öz asitanında, Hədəf oldum gözəllər zülmünə mən binəva hər dəm.

Gözüm qanla dolar, həsrətdən ahım göylərə qalxar, Xəyalımda dolandıqca mənim ol məhliqa hər dəm.

Sənin eşqinlə mən bağlanmışam, canan, əzəl gündən, Bu eşqi tərk qılmam, baş ola təndən cida hər dəm.

Ömür ol sərv boylu dilbərin eşqində sərf oldu, Təəssüf etmərəm, bir ömr ona qılsam fəda hər dəm.

Füzuli naümid olsaz vüsali-yar zövqündən, Əgər can vermək ilə göstərə yarə vəfa hər dəm.