Bir can ki, ondan almaya azar hardadır

Bir can ki, ondan almaya azar hardadır? Ondan deyil o kəs ki, tələbkar hardadır?

Asudə bir könül ki, ona gündə naz elər, Bir zülm qılmasın o sitəmkar, hardadır?

Göstər cahanda sən elə qəlb sahibi, Şövqi-ləbilə olmaya xunbar, hardadır?

Rəftarı, sanma, tək məni salmış ayaqlara, Bir qəlbi yıxmamışsa o rəftar, hardadır?

Zənn etmə təkcə hüsnünə heyran olan mənəm, Kim ki, deyilsə valehi-rüxsar, hardadır?

Hər yerdə cilvə etmədədir, cilvəsiz, vəli Bir göz ki, oldu qabili-didar, hardadır?

Yandı cəfayi-dərdinə mənzil olan könül, Heyrətdəyəm ki, möhnəti-dildar hardadır?

Qəmdən Füzulinin ürəyi bərqərar olub, Ya Rəb, verən qərari-dili-zar hardadır?