Bağə girdim, səri-kuyin anıb əfğan etdim

Bağə girdim, səri-kuyin anıb əfğan etdim, Gül görüb, yadın ilə çaki-giriban etdim.

Baxuban nərgisə, əyyar gözün qıldım yad, Nərgisi naləvü əfğanıma heyran etdim.

Qönçəvü lalə demə, dağ qarasın qoparıb, Alu alayə sarıb səbzədə pünhan etdim.

Güli-tər üzrə düşən şəbnəmə düşdü nəzərim, Gözümü şövqi-cəmalında dürəfşan etdim.

Bərgi-gül sanma ki, xunabə tökən dəmdə gözüm, Neçə yaprağə cigər qanı silib, qan etdim.

Görücək sünbülü, andım şikəni-kakilini, Sünbüli giryəvü ahimlə pərişan etdim.

Ey Füzuli, rəvişi-əql məlul etdi məni, Səhv qıldım ki, cünun dərdinə dərman etdim.