Badeyi-rahəti-candır, qədəhi-cana ümid

Badeyi-rahəti-candır, qədəhi-cana ümid, Dəmbədəm nəşə verir xatiri-insana ümid.

Zövq alır şövq ilə ümmidi-səfadan hər kəs, Çeşmi-can ilə baxar vəsləti-canana ümid.

Dözmək aləmdə qəmi-hicrə yaman müşküldür, Gör neçə səbr verir qəlbi-pərişana ümid.

Can xilas eyləyə bilməz mərəzi-möhnətdən. Çarəbəxş olmasa gər xəstəyi-hicrana ümid.

Gəl ümid eylə könül sən də ümidgahlara, Neçə ki, ellər edir rəhbəri-dövrana ümid.

İntizarıq dəri-meyxanəyi-rəhmətdə bu gün, Nə olur versə bizə bir dolu peymana ümid.

Naümid olma Şəfai bu Azərbaycandır. Burda hər müşkülü tez döndərir asana ümid.