Zəlimxan

Uzaq eldə necə keçir günlərin, Yaxın eldən aralanan Zəlimxan. Sinəsində dərdin-qəmin dağları, Cərgə-cərgə sıralanan Zəlimxan.

Sənsən ocaq, sənsən oda asiyan, Kürəyində el yükünü daşıyan, Bir canıyla yeddi yerdə yaşayan, Yeddi yerə parçalanan Zəlimxan.

Baxma qəlbin ağrılara hədəfdi, Harda olsan üzün haqqa tərəfdi. İstanbulda ölməyin də şərəfdi, İstanbulda yaralanan Zəlimxan.