Yusifim, Zəlimxanım

Hara gedirəm gedim, harda oluram olum, Gəlib sizdə birləşir izim, cığırım, yolum. Keçmişim, gələcəyim, Bəyim, xaqanım, xanım, – Yusifim, Zəlimxanım!

Dilimdə bayatıdı, dodağımda oxşama, Mən sizdən oxuyuram hey səhərdən axşama. Qana damardan yaxın yer üzündə heç nə yox, Damarda axan qanım, – Yusifim, Zəlimxanım!

Layladan həzin səsim, Baldan şirin həyatım, Məndən sonra dünyada davam edən həyatım. Ruhumun genişliyi, Qəlbim, ciyərim, qanım, – Yusifim, Zəlimxanım!

Biri atamın adı, biri də öz adımdı, Sabaha uçmaq üçün qolumdu, qanadımdı. Açılan xoş sabahım, sökülən qızıl danım, Yusifim, Zəlimxanım!