Yetişməz

Yüz harayla əldən çıxan gəncliyi, O vaxt dönməz, o ərəfə yetişməz. Min tərəfə fikrin gedər, qayıdar, Əli gedib bir tərəfə yetişməz.

Cavanların tayı-tuşu cavanlıq, Şirin ömrün şax duruşu cavanlıq, Başımızın şahlıq quşu cavanlıq, Ömür bir də o tərəfə yetişməz.

Keçər gecə, yavaş-yavaş atar dan, Can üzülər, kəsilərsən tutardan, Uçan durnan ayrılıbsa qatardan, Eşqin gedib səfdən-səfə yetişməz.

Dərdi olan yarasını duzladı, Şaxta vurdu, damar-damar buzladı. Sədəfli saz sızım-sızım sızladı, Əl nə saza, nə sədəfə yetişməz.

Sevgi adlı qibləyə tut üzünü, Nəyin varsa, de, dünyaya sözünü. Ay Zəlimxan, nahaq yorma özünü, Heç bir arzun son hədəfə yetişməz.