Yaşamısan
Dayan, hərdən arxaya bax, Gələn insan, gedən qonaq. Ya şam olub, ya da çıraq, Əridinsə, yaşamısan!
Ömrü keçirməsən hədər, Ölüm ölməzliyə dəyər. Bu dünyadan dünya qədər Yaradınsa, yaşamısan!
Od yollarda, su yollarda, Günahın var, yu yollarda. Sürünmədin bu yollarda, Yeridinsə, yaşamısan!
Şər ilandı, şər əfidi, Saflıq ömrün şərəfidi. Qoru görüm şərəfi di, Qorudunsa, yaşamısan!