Yaşa bu möhləti
Su məni yandırdı, su məni yaxdı, Yandım dodağımdan dilimə qədər. Göynədim, gözümdə göllər titrədi, Yandım içərimdən çölümə qədər.
Həyat baldan şirin, bahadan baha, Büründüm tüstüyə, bələndim aha. Yanmaq sınağından çıxmışam daha, Görmüşəm közümdən külümə qədər.
Buzda don, qarda don, donmağı birmiş, Suda yan, odda yan, yanmağı birmiş, Ömrün çöpə dönüb sınmağı birmiş, Hamı yol gedirmiş zülümə qədər.
Bir sözü deməyə dilim gəlmədi, Bir gülü tutmağa əlim gəlmədi. Zəlimxan, hələ ki, ölüm gəlmədi, Yaşa bu möhləti ölümə qədər.