Xəbərim olmadı
Vuran məni elə vurdu, Daşdan xəbərim olmadı. Ayaq elə dolaşdı ki, Başdan xəbərim olmadı.
Körpəlikmiş keçib gedən, Cavanlıqmış köçüb gedən. Budağımdan uçub gedən Quşdan xəbərim olmadı.
İtdi səsim, batdı ünüm, Yoxluğadı səmtim, yönüm. Elə keçdi ömrüm-günüm Yaşdan xəbərim olmadı.
Göy sağıldı, bulud sağdı, Dərə-təpə gördüm ağdı. Qar başıma nə vaxt yağdı, Qışdan xəbərim olmadı!