Xatırlayarsan
Unut mənim kimi unudulmazı, Dağlara baxanda xatırlayarsan. Məni bu intizar, səni bu həsrət, Yandırıb-yaxanda xatırlayarsan.
Taparsan təzədən itən ömrümü, Səninlə böldüyüm o tən ömrümü. Keçən günlərimi, ötən ömrümü, Buludlar axanda xatırlayarsan.
Yağdır başım üstə, yağdır arını, Poz mənim ömrümün naxışlarını. Şairin qəzəbli baxışlarını, Şimşəklər çaxanda xatırlayarsan.