Ürəyimdə

Azərbaycan bir nəğmədir, Sözü mənim ürəyimdə. Eşqi uca zirvələrdə, Özü mənim ürəyimdə.

Nə qorxusu qışın, qarın, Nə vaxt olsa seyrə varın. O çağlayan bulaqların Gözü mənim ürəyimdə.

Döyüşdədir hər gün, hər ay, Düşmən üstə, çəkir haray – Qafur, Mehdi, Cəmil, Gəray, Həzi – mənim ürəyimdə.

Gözüm qaynar gözə baxdı, Alov əmdim körpə vaxtı. Ana Vətən bir ocaqdı, Közü mənim ürəyimdə.