Sönməzim
Cənublu şair qardaşım Sönməzin
“Sənsizləmişəm” şeirinə cavab
Məktubunu yana-yana oxuduq, Dərdə qarşı yenməz olduq, Sönməzim! Duyğuların qanadında ucaldıq, Zirvələrdən enməz olduq, Sönməzim!
Yaranmadan qəmlər bizə tanışdı, Zaman deyir öz dərdini danış, di. Yadlar bizim yerimizə danışdı, Nə zaman ki, dinməz olduq, Sönməzim!
Gör taleyi, gör qisməti, gör işi, Qar-boranlı həsrətimi gör, üşü. Dalğalardan istəyirik görüşü, Araz üstə dönməz olduq, Sönməzim!
Sözlərinə şeirim, sözüm çapardı, Sorağını eldən-elə apardı. Bu ayrılıq çoxdan bizi çapardı, Nə yaxşı ki, dönməz olduq, Sönməzim!
Əl çəkmədi bizdən qarayaxalar, İstədilər bizə qara yaxalar. Od vurdular, külümüzə baxalar, Yana-yana sönməz olduq, Sönməzim!