Səyyah nəğməsi
Eyni adlı şeirin müəllifi,
dahi alman şairi
İohan Volfqanq Höteyə
“Səyyah nəğməsi”ni yazan nəğməkar, Bu yurdu görməmək günah olarmış. Ürəkdə duyğular tanrılaşanda, Nə qüssə, nə kədər, nə ah olarmış. Qaya kölgəsində axşam düşərmiş, Ağac kölgəsində sabah olarmış. Göy çəmən qucağı, gur bulaq başı, İnsana ən ulu dərgah olarmış. Ətəkli meşələr, zirvəli dağlar, Gözəllik taxtında bir şah olarmış. Ən böyük səyyahlar şairlər olub, Ən güclü şairlər səyyah olarmış. İnsan gəzə-gəzə peyğəmbərləşər, İnsan duya-duya Allah olarmış!