Qoşalaşdırıb

Yaradan heç nəyi tək yaratmayıb, Çəməni bulaqla qoşalaşdırıb. İlhamı şeirlə, ürəyi sözlə, Nəğməni dodaqla qoşalaşdırıb.

Yerləşmir otağa, sığışmır evə, Baxırsan, saçları qapqara şəvə. Babanın yanında darıxmır nəvə, Qocanı uşaqla qoşalaşdırıb.

Dünyanın hesabı yazılmalıymış, Sevinci, əzabı yazılmalıymış, Tarixin kitabı yazılmalıymış, Qələmi varaqla qoşalaşdırıb.

Həyata can verib qəlbin səsləri, Dünya unutmayıb duyan kəsləri. Ürəkdə yaşayan müqəddəsləri Alışan ocaqla qoşalaşdırıb.

Zəlimxan, yurdundu bu doğma diyar, Burda beşiyin də, məzarın da var. Təbiət özüdür böyük sənətkar, İnsanı torpaqla qoşalaşdırıb.