Qadan alım

Səhər-səhər bağda gəzən nazənin, Dəstinlə qönçəni üz, qadan alım! Süsəndən, sünbüldən, lalə, nərgizdən, Siyah tellərinə düz, qadan alım!

Sallanıb-sallanıb özünü öymə, Elə süzgün baxıb qəlbimə dəymə, Yaralı bağrıma, gözəl, daş döymə, Qoyma sinəm üstə köz, qadan alım!

Göyərçinsən, eyvanıma qonasan, Ərz eliyəm, dərdi-dilim qanasan. Əyri telli, yaşılbaşsız sonasan, Gəl bizim göllərdə üz, qadan alım!

Durub hüsnün kitabına baxıram, Şirin canım atəşinə yaxıram, Şövqə gəlib şirin-şirin oxuram, Çatmır tərifinə söz, qadan alım!

Aşıq Ələsgərin qədrini bilsən, Ağladıb, çeşminin yaşını silsən. Əgər qədəm qoyub, bir bizə gəlsən, Yerin var göz üstə, gəz qadan alım!