O yerlər

Dolansanız doğulduğum yerləri, Yaddaşımdan xəbər verər o yerlər. Hansı gündə sevda dolub başıma, Ataşımdan xəbər verər o yerlər.

Mənim kimi selə dönüb axsanız, Baxışlarda şimşək olub çaxsanız, Bulaq üstə gözəllərə baxsanız, Göz-qaşımdan xəbər verər bu yerlər.

Nur payladım qohumlara, yadlara, Sevinc verdim qəmginlərə, şadlara, Nə zaman ki ömrüm getdi badlara, Qan-yaşımdan xəbər verər o yerlər.

Dar günümdə anam olub ağlayar, Bacım olub yaralarım bağlayar, Xatirələr çeşmə kimi çağlayar, Sirdaşımdan xəbər verər o yerlər.

Hər görüşdən bir heyrətə gələrsiz, Vətən deyib ziyarətə gələrsiz, Zaman gələr, ibadətə gələrsiz, Başdaşımdan xəbər verər bu yerlər.