Nə yaxşı

Evdə ruh sıxılıb, can darıxanda, Nə yaxşı çıxmağa səfər var, Allah. Boğanda insanı zülmət gecələr, Nə yaxşı açılan səhər var, Allah.

Min dəfə xəmirtək qarışdır, yoğur, Dərdimiz dərindi, yükümüz ağır. Yenə dan sökülür, yenə gün doğur, Deyəsən xoş gələn xəbər var, Allah!

Ömrümüz daha da kəm olardı, kəm, İllərlə yanaqda qurumazdı nəm. Nə yaxşı insandı insana həmdəm, Nə yaxşı yer üstə bəşər var, Allah.